O Prefecto do Dicasterio para os Laicos, a Familia e a Vida, o cardeal Kevin Farrell, presentou o X Encontro Mundial das Familias que se celebrará en Roma do 22 ao 26 de xuño de 2022. O lema do Encontro é “O amor familiar: vocación e camiño de santidade” e servirá para clausurar o Ano da Familia decretado polo papa Francisco o pasado 12 de marzo con motivo do quinto aniversario da publicación da Amoris laetitia.

O encontro foi presentado vía en liña, en directo streaming para todo o mundo. Na súa intervención mons. Farrell lembrou que nesta ocasión o encontro non se desenvolverá unicamente en Roma, senón que será, tal e como o papa Francisco anunciou xa en xullo, un evento multicéntrico. É dicir, todas as dioceses do mundo poderán organizar actos e eucaristías nas mesmas xornadas nas que o papa reunirá en Roma só aos delegados das conferencias episcopais, os movementos e as asociacións familiares nunha medida de prudencia que ten en conta a pandemia por coronavirus.

Na mesma rolda de prensa a subsecretaria do Dicasterio para os Laicos, a Familia e a Vida, Gabriella Gambino, presentaba o programa do congreso. Anunciou que a eucaristía deste X Encontro das familias celebrarase na tarde do sábado 25 de xuño “para que todas as familias do mundo poidan celebrar co seu bispo o domingo”. O programa finalizará o domingo pola mañá co rezo do *Ángelus co Papa na Praza de San Pedro.